• Сообщается от Ибн ‘Аббаса, что Посланник Аллаhа ﷺ сказал (смысл): «Тот, в сердце которого нет ничего из Корана, подобен разрушенному дому!». Хадис передал ат-Тирмизи 2913.

ИМАМ МАГЬДИ

Ахирзаманалда питнаби цIикIкIине рукIин гьелъул бицарал хIадисал гIемерал руго. Гьале къо бахъанагIан цIикIкIунел руго питнаби. Гьединго гIагарлъулеб буго Магьди-имам вахъунеб заманги. Ахир гьечIеб жо Аллагьас бижун гьечIелъул, гьел питнабазеги ахир Магьди-имамас лъезе буго. Гьединлъидал нижеца къокъабго баян кьолеб буго гьесул сипат-сураталъул ва наслу-тухумалъул.

МАГЬДИ-ИМАМАСУЛ СИПАТ

Абу- СагIидил Худриясдасан бицараб Аварагасул (с.гI.в.с) хIадисалда буго:  «Гьев вукIине вуго жиндиралда релълъараб гIебаб нодоялъул, бегIераб мегIералъул, 40 сонилаб гIумруялъул чи. Гьев нижер хъизамалда бищун гIолохъанав вуго. Гьесул гьумер букIине буго гвангъараб, къаси мехалъ цIураб шагьри-моцI гIадаб», – абун. Хадубги Аварагас (с.гI.в.с) абун буго:  «Нужедаги румаздаги гьоркьоб 4 нухалъ рекъел ккезе буго. Гьебги Гьарунил тухумалъул чияс бетIерлъи гьабулеб заман букIине буго. Гьебги 7 соналъ халат бахъизе буго. Цинги Аварагасда (с.гI.в.с) гьикъанила: «Я Бичасул  Авараг (с.гI.в.с), гьеб заманалда бусурбабазул имамлъун щив вукIине вугев?» – абун. «Гьеб заманалъ имамлъун вукIине вуго дир тухумалдаса чи, жиндир гIумруялъул 40 сонги бугев, нуранияб берцинаб гьумералъул, зодиб бугеб гвангъараб моцIалда жив релълъарав», – абун.

Хадубги Аварагас (с.гI.в.с) гьесие сипат гьабун буго: «Гьесул берал рукIине руго гIатIидал, цаби – цIвакарал, гьурмада букIине буго цо хасаб (рекIее лъикIаб асар гьабулеб) гIаламат, хасго кIаркьабазда. Хъарщилагаялдаги аварагасул  хасаб мугьру букIине буго. Гьев вукIине вуго гьоркьохъеб лагаялъул, ризаб мегежалъул инсан», – ян. Гьаб бицараб сипаталда рекъон, нилъее мухIканлъула, имам Магьди вихьаравго цогидаздаса ватIа вахъизе кIолеб батIияб  нуралъул, хасаб берцинлъиялъул, цо нухалъ берчIварабго рекIелъ восулев, адаб камилав чи вукIине вугеблъи. Гьев вукIине вуго дагь кIалъалевлъун, жинцаго хабар киданиги байбихьуларевлъун, цIакъ сабурав, хIалимлъи жиндилъ даимав, ракI-ракIалъ Аллагьасда божулел хIакъал муъминзабазул цоявлъун, жидер тIабигIаталъул хIакъалъулъ.

Аварагас (с.гI.в.с) асхIабаздабазда абурав гIадав: «ХутIарал гIадамазда лъалеб букIарабани гьесда лъалеб жо,  гьел дагьал релъилаан, гIемер гIодилаан», – ян. Аварагас (с.гI.в.с) абун буго: «Ахир замана тIаде щвараб мехалъ Аллагьас витIизе вуго чапар, цIарги диралда релълъарав, гьабулеб гIамалги дир гIадаб, жиндаги ГIабдуллагьилан абизе вугев», – илан. Магьди-имам  Аварагасул (с.гI.в.с) наслуялдасан бусурбабазул цевехъан

ТIоцебесеб иргаялда, нилъеца бицина гьесул цIаралъул хIакъалъулъ. Гьев лъала МухIаммад бину ГIабдуллагь ал-ХIасанию ал-ГIалию абун.  Аварагас (с.гI.в.с) абуна: «Гьаб дунялалъул цохIо къо гурони хутIун гьечIонигицин, Аллагьас гьеб къо халат гьабила, дидаса цо чи витIизегIан», – ян. Цогидал риваятазда  буго:  «Дир хъизаналдаса (умматалдаса) вукIине вуго, цIарги диралда релълъарав, гьесул инсул цIарги дир инсул цIаралда релълъарав», – илан. Цоги хIадисалда абун буго: «ГIасруги инаро, къоги тIагIинаро, гIарабазда кверщел дир хъизаналъул (умматалдаса) чияс гьабичIого (вачIинчIого), жиндир цIарги диралда релълъарав», – илан. Буго цоги гьадинаб хIадисги:  «Чара гьечIого ракь цIезе буго ритIухълъи гьечIолъиялъ.

РахIму-цIоб  гьечIолъиялъулъги, ритIухълъи  гьечIолъиялъулъги ракь тIерхьараб мехалъ (гьеб гIемерлъараб мехалъ), Аллагьас  дир рахъалдасан чапар витIизе вуго, диралда жиндир цIар релълъарав», – абун. Руго гьединго гIемерал хIадисал гьесда цIар «МухIаммад бину ГIабдуллагь» букIине бугин тасдикъ гьабулел. Амма бищунго цIакъ гьев машгьурлъизе вуго «Магьди-имамасул» цIаралда гъоркь.

Аварагас (с.гI.в.с) абуна: «Магьдил  цIар диралда релълъараб буго. Гьесул инсул цIарги дир инсулалда релълъараб буго», – ян. Гьаб хIадисалдасанги нилъеда бичIчIула гьесул цIар  рагIизе букIин  аслияб къагIидаялъ «Магьди» хIисабалда. Амма гьесул хIакъикъияб цIар ккола «МухIаммад бину ГIабдуллагь». Гьеб цIаралда тIасан гIемерал баянал руго.

Магьди-имамасул цоги цIар букIине буго «Ал-Жабир» абун. «Жабир» абураб рагIул магIнаги ккола  – «ракIал тамах гьарулев (лъикIлъизарулев)». Магьди-имам вачIинегIан ракьалда тIибитIун букIине буго питна-кьал, цIоб ва ритIухълъи гьечIолъи. Гьединлъидал гIадамазул ракIалги рукIине руго чара къосараб пашманлъиялда. Магьди вахъун хадусан жидеда хIал гьабулезул, мискин-пакъирасул, жинда зулму бугев чиясул гIумру бигьалъизе буго, гьезул ракIазе парахалъи щвезе буго. Гьелъ абула гьесда «Жабирилан».

Магьди-имамасул тухум-кьибил.

Гьев ккола МухIаммад  (с.гI.в.с) аварагасул наслуялъул чи.  Уму Саламатидасан (р.гI.) бицунеб хIадисалда буго, Аварагас (с.гI.в.с) абунила: «Магьди вукIине вуго дир тухум-кьибилалдаса, ФатIиматил (р.гI.) лъималаздасан», – ин. Агьлу-суннаталъул гIакъидаялда рекъон гьев кколев вуго Аварагасул (с.гI.в.с) яс ФатIиматил (р.гI.) наслуялдасан. Дагьабги мухIканго – ФатIиматилги (р.гI.) ГIалилги (р.гI.) вас ХIасанил тухумалдасан. Гьелде тIоритIел гьабу-лел хIадисалги гIемерал руго.

Жиндирго васасухъ балагьараб мехалъ ГIалица (р.гI.) абунин Абу-ИсхIакъица бицана: «Дир вас – Сайид вуго (гьеб цIар кьун букIанила гьесие живго Аварагас (с.гI.в.с)) ва гьесдасанги лъугьине вуго жиндир цIар Аварагасулалда (с.гI.в.с) релълъарав, живгоги гIамал-тIабигIаталъул рахъалъ  Аварагасда (с.гI.в.с) релълъарав. Гьалде тIадеги буго цоги хIадис Аварагас (с.гI.в.с) абунила: «Дир ясалъул вас – Сайид вуго. Гьесие гIоло ТIадегIанав Аллагьас кIиго кIудияб халкъ цолъизабизе буго. Гьенисанги вахъине вуго жиндир гIамал-хасият ва тIабигIат диралда релълъарав чи, амма гьурмадасан релълъарав вукIине гьечIо», – ян. Гьел гурелги гIемерал руго, Магьди-имам вахъине вукIиналъул бицарал Аварагасул (с.гI.в.с) хIадисал. ХIасан ккола ГIали-асхIабасул вас. Гьевги вукIана цIакъ хIалимав, хъулухъ-цIаралда хадув вортуларев, кIудияб иш тIаде босизе бокьуларев чилъун. Аллагьасда цебе гьелъул жаваб кьезе ккеялдаса хIинкъун, жиндирго ва хъизаналъул гурони жавабчилъи тIаде босизе бокьуларев чи. Дунял гIасилъиялдаса хвасар гьабулев чи гьесул наслуялдаса вахъинги, ТIадегIанав Аллагьас  ХIасанил гIамалалъухъ гьесие сайгъатлъун кьей ккола. Цоги гьезул релълъенлъи буго, Аллагьасукьа хIинкъиялъ кIудияб хъулухъ-цIаралдаса инкар ккурав чи вукIинги. Кинниги Магьди-имамас тIаде босизе ккана гьеб жавабияб иш. Гьединго нилъеда кIочене бегьуларо Магьди-имам вахъиналда божи агьлу-суннаталъул гIакъидаялда жаниб тIадаб букIин, малаикзабазда, ахир Къиямасеб къо чIеялда нилъ божулелго гIадин. Щивав бусурманчиясда тIадабги буго, щибго щаклъи гьечIого, Магьди-имам вахъине вукIиналда божизе. Аллагьас нилъее тавфикъ кьейги, Гьев вахъиналде кIовухъе хIадурлъизе. Амин.

 

Поделиться в соц. сетях

Опубликовать в Facebook
Опубликовать в Мой Мир
Опубликовать в Одноклассники
Закладка постоянная ссылка.

Возможность комментирования заблокирована.