• Сообщается от Ибн ‘Аббаса, что Посланник Аллаhа ﷺ сказал (смысл): «Тот, в сердце которого нет ничего из Корана, подобен разрушенному дому!». Хадис передал ат-Тирмизи 2913.

МУХIАММАД (жинда салатги саламги лъеяв) АВАРАГАСУЛ ГIУМРУЯЛЪУЛ КЪОКЪАБ БАЯН (авар.яз.)

«Нужер цонигиясул иман камиллъуларо, жиндир нафсалдасаги, боцIиялдасаги, лъималаздасаги, киналго гIадамаздасаги, Дун цIикIкIун вокьун гурого» (ХIадис)

Лъаларев чи вокьизе рес гьечIелъул, гьединлъидал нилъеда Аваргасул (жинда салатги саламги лъеяв) гIумру лъазабизе тIадаб буго.

Авараг (жинда салатги саламги лъеяв) ккола Адамил зурияталъул, Ибрагьимил миллаталъул, ИсмагIилил наслуялъул, гIарабияб мацIалъул, бацIцIадаб аслуялъул, къурайшияб насабалъул, гьашимияб кьибилалъул, ГIабдуллагь инсуе, Аминат эбелалъе, Маккаялда гьавурав (571 соналъ), Мадинаялда вукъарав (632 соналъ).

Аварагасул (жинда салатги саламги лъеяв) эбелалъул ургьиб 2 моцI тIубайдал, эмен хвана, гIумруялъул 6 сон тIубайдал, эбелги хвана. Гьелдаса хадуб, кIудияв эмен ГIабдулмутIалибица хьихьана. ГIумру 8 соналде бахиндал, ГIабдулмутIалибги хун, гIаламалъулго Хирияв (жинда салатги саламги лъеяв) хьихьизе вачана имгIал АбутIалибица.

Аварагасул (жинда салатги саламги лъеяв) 25 сон тIубайдал, гьес 40 сон барай Хувайлидил Хадижатгун ригьин гьабуна.

Къурайшияз КагIба цIи гьабулаго, Хириясул (жинда салатги саламги лъеяв) 35 сон букIана, ЧIегIераб гамачI гьелъул бокIоналда лъезе, Аминав (божи бугев) вукIиналъ, Гьев тIасаги вищана.

40 соналде вахиндал, ХIираалъул нохъода «Икъраъ» аятги рещтIун, Авараглъи кьуна. Гьеб Къуръан рещтIана Аварагасде (жинда салатги саламги лъеяв) замана бихьун, бакIал бихьун 23 соналъ.

Авараглъи кьун 10-абилеб соналъ, имгIал АбутIалибги, муъминзабазул эбел Хадижатги къадаралде щвана, гьеб соналде «пашманлъиялъул сонилан» цIарги тана. Гьесул (жинда салатги саламги лъеяв) рекIелъа пашманлъи нахъе босизе, БетIергьанас Исраъ-МигIражалдалъун кIодоги гьавун, умматалъе рахIматлъун щуябго как тIад къана.

13 соналъ Маккаялдаги чIун Аварагас (жинда салатги саламги лъеяв) халкъ диналде ахIана. Капурзабазул рахъалъан зулму цIикIкIиндал, авараглъи кьун 14-абилеб соналъ Мадинаялде гьижра гьабизе ккана. Гьелдалъун исламияб тарих байбихьана, гьеб гьижра дин тIибитIиялъе аслияб гIилалъун ккеялъе гIоло. Гьижра гьабулелъул, капурзабаздаса рахчун Абубакар АсхIабгун цадахъ, Аварагас (жинда салатги саламги лъеяв) Савралъул нохъоялда 3 къо бана.

Мадинаялде щвелелде, Къуба абураб бакIалда тIоцебесеб масжидалъе кьучI лъуна, хадубккун Къуръаналда, Аллагьасукьа хIинкъиялда тIад гIуцIарабилан, жиб рехсараб. Мадинаялде щведалги, Аварагас (жинда салатги саламги лъеяв) тIоцебе кIвар кьуна масжид баялъе. ГIаламалъул Хирияс чIезе бакIлъун Абуаюб Ансариясул рукъ тIаса бищана.

Мугьажирал-Ансаразда гьоркьоб вацлъиги рагIизабун, Мадинаялда рукIарал ягьудиялгун ракълилаб къотIиги гьабун, Аварагас (жинда салатги саламги лъеяв) исламияб гIуцIцIиялъе кьучI лъуна. Гьеб гIуцIцIиги динги цIунизе гъазаватал гьаруна.

Гьижрияб 6-абилеб соналъ Аварагас (жинда салатги саламги лъеяв) капурзабигун ракълилаб къотIи гьабуна 10 соналъул болжалалда ва гьелда хадуб ханзабазухъе исламалде ахIун кагъталги ритIана. Амма 2 соналдасан (гьижрияб 8-абилеб соналъ) капурзабаз гьеб къотIи хвезе гьабуна ва гьеб сабаблъун ккана рагъцин гьабичIого Макка бахъиялъе, ва ширкалдаса бацIад гьабиялъе. Капурзабаз гьабураб кигIан кIудияб зарал букIаниги, рецIел босизеги кIолаго, Маккаялъул агьлуялдаса Авараг (жинда салатги саламги лъеяв) тIаса лъугьана.

Гьижрияб 10-абилеб соналъ Аварагас (жинда салатги саламги лъеяв) 90 азаргоялдаса цIикIкIарал АсхIабзабигун цадахъ ахирисеб хIеж гьабуна ва ГIарафалда умматалъего насихIатал гьарун хитIабги гьабуна. Кинабниги гьес 1 хIежги 4 гIумраги гьабуна.

Гьижрияб 11-абилеб соналъул 12-абилеб РабигIуль аввалалъ ГIаишатил рокъоб гIаламалъулго Хириясул (жинда салатги саламги лъеяв) рухI босана ва гьенивго вукъана. Гьесул букIана 63 сон.

Аварагасул (жинда салатги саламги лъеяв) инсул рахъалъан умумул: ГIабдуллагь, ГIабдулмутIалиб, Гьашим, ГIабдуманаф, Къусайю, Килаб, Муррат, КагIбу, Луайу, Гъалиб, Фигьру, Малик, Назар, Кинанат, Хузаймат, Мудрикат, Ильяс, Музар, Низар, МагIад, ГIаднан.

Эбелалъул рахъалъан умумул: Аминат, Вагьбу, ГIабдулманаф, Зугьрат, Килаб – гьасулъ эбелалъулги инсулги кIиябго насаб жубала.

Рахьдал эбелал: Сувайбат, ХIавлат, Мунзирил яс Умму Айман, СагIдиязул ХIалимат, гьей гурей цогидай ХIалиматги, 3 чIужу жидеда цIар ГIатикат бугел.

Аварагасул (жинда салатги саламги лъеяв) руччаби: Хадижат, Савдат, ГIаишат, ХIафсат, Зайнаб, Умму Саламат, Зайнаб бинту ДжахIш, Джувайрият, Сафият, Умму ХIабибат, Маймунат, РайхIанат.

Лъимал: Къасим, Зайнаб, Рукъият, ФатIимат, Уммукульсум, ГIабдуллагь – гьал руго Хувайлидил Хадижатица нилъер Хириясе гьарурал. Ибрагьим – Мариятица гьавуна.

Гьесул заманалда ккарал аслиял гъазаватал: Бадр, УхIуд, Хандакъ, ХIудайбият, Муътат, ФатхI, ХIунайн, ТIаиф, Табук.

ТIадегIанав Аллагьас нилъер Авараг (жинда салатги саламги лъеяв) рикIкIен гьечIел мугIжизатаздалъун тIокI гьавуна: моцI кIийиде хъвалхьин, Исраъ-МигIраж, килщазда гьоркьосан лъим бакки, дагьаб тIагIам гIемер гьаби, гъотIол хIехь зигарди, чIинхаз Гьесул кодоб тасбихI бачин, букIине бугеб бицин, нахъ ругел чагIи цере ругел гIадин рихьи, мунафикъзабазул рекIелъ ругел балъголъаби лъайи. Гьезул бищун кIудиябги – хирияб Къуръан буго.

 

Нилъер хирияв Авараг (жинда салатги саламги лъеяв) вукIана гьоркьохъеб лагаялъул, хъахIлъиги багIарлъиги данделъараб кьералъул ва цIураб моцI гIадин, гвангъараб гьумералъул гьайбатав инсан. Хириясул (жинда салатги саламги лъеяв) цаби рахьгIан хъахIал рукIана. ЧIегIераб, гъункараб, берцинаб мегежги букIана Гьесул (жинда салатги саламги лъеяв). ХIабибасул (жинда салатги саламги лъеяв) черхалдаса кидаго мискалдасаги гьуинаб махI букIунаан, ва гIемерисеб ретIел хъахIаб букIунаан. ГIаламалъул Хириясул (жинда салатги саламги лъеяв) рагIад лъугьунароан. Гьесул (жинда салатги саламги лъеяв) рилълъин хехаб букIана, вилълъунаго гьесда хадув чи гIунтIулароан. Аварагасул (жинда салатги саламги лъеяв) берцинаб гьаракь букIана, кIалъай кидаго рагьараб роцIараб букIунаан. Гьев (жинда салатги саламги лъеяв) цIакъ кIал пасихIав, магIна бугел рагIаби гIемер хIалтIизарулев вукIана. Бичасул Авараг (жинда салатги саламги лъеяв) вукIана гIадамазул бищунго бахIарчиявги, ракI гIатIидавги ва нич бугевги. Гьес (жинда салатги саламги лъеяв) кьураб рагIи кколаан, гIагарлъиялъулгун лъикIаб бухьен букIунаан. Цебе лъураб квеналда киданиги гIаламалъул Хирияс (жинда салатги саламги лъеяв) гIайиб чIвайчIо. Сахаватлъиялъул рахъалъ Аварагасде (жинда салатги саламги лъеяв) инсан вахунаро, хасго Рамазан моцIалъ, кодобе щвараб щинаб бикьулаан Гьес. Руччабазе кумек гьабулаан, рокъосел хIалтIаби гьарулаан. КигIан гьитIинаб бугониги сайгъат къабул гьабулаан, амма садакъаялъе кьураб жо жиндиего хIалтIизабулароан.

Щибаб рецц Аллагьасе буго нилъ иманалда ратидал ва хирияв ХIабибасул (жинда салатги саламги лъеяв) умматалдасан нилъ гьаридал. ТIадегIанав Аллагьас халкъул гIаламалъего рахIматлъун витIарав, Къуръан тIабигIатлъун букIарав хирияв Аварагасул (жинда салатги саламги лъеяв) берцинал тIабигIатал тIуран загьир гьаризе инсанасда хIал кIоларо. Нилъер Аварагасул (жинда салатги саламги лъеяв) камиллъиялъулги хиралъиялъулги гIатIидаб ралъдал цо гьитIинабго къатIралъун тезе бегьила гьаб къокъабго баян.

Поделиться в соц. сетях

Опубликовать в Facebook
Опубликовать в Мой Мир
Опубликовать в Одноклассники
Закладка постоянная ссылка.

Возможность комментирования заблокирована.